कुरुवंशातील धर्मयुद्धाने भारतभूमीला हादरवून सोडले, त्या गोष्टीला आता हजारो वर्षे लोटली आहेत. परंतु अजूनही आपल्या पूर्वजांचा हा इतिहास आपल्याला भुरळ घालतो. आजही या महाकाव्यातील व्यक्ती आणि घटनांवर आपण तावातावाने चर्चा करतो. आपल्या मित्र मैत्रिणीची बाजू घ्यावी तसे आपण आपापल्या आवडत्या व्यक्तिरेखांची बाजू मांडतो. महाभारतावर आधारित अनेक काल्पनिक कथा कादंबऱ्या, विविध रूपांतरे आणि पुनर्कथने आजही लिहिली जात आहेत. या साहित्याची लक्षणीय संख्या महाभारत आजही तितकेच प्रासंगिक असल्याची ग्वाही देते.

सामान्यतः महाभारताचे कथानक ढोबळपणे माहित असले तरी त्याभोवती बरेच प्रश्न आणि मिथकं प्रचलित आहेत, जसे युद्धाची भौगोलिक व्याप्ती काय होती? द्रोणाचार्यांनी कर्णाला शिष्य करून घेण्यास नकार दिला होता का? द्रौपदीवर राणी म्हणून कोणत्या जबाबदाऱ्या होत्या? तिने दुर्योधनाची खिल्ली उडवली होती का? महाभारताच्या काळातील स्त्रिया दबलेल्या आणि अधीन होत्या का? युद्धाच्या दरम्यान कोणत्या व्युहांची रचना केली होती? पांडवांच्या पुत्रांचे युद्धातील कर्तृत्व काय होते? महाभारताचा दक्षिण भारताशी काही संबंध आला होता का? युद्ध संपल्यानंतर काय झाले? असे अनेक गुंतागुंतीचे प्रश्न वाचकाची मति गुंग करतात.

लेखिका अमी गणात्रा यांनी ह्या पुस्तकातून अशा अनेक प्रश्नांची उत्तरे दिली आहेत. त्या बरोबरच मिथकांचे खंडन केले आहे, लोकप्रचलित कल्पना फेटाळून लावल्या आहेत आणि सामान्यतः ज्ञात नसलेल्या पैलूंवर प्रकाश टाकला आहे. वास्तव मांडण्यासाठी त्यांनी सर्वमान्य अस्सल स्त्रोतांमधून उपलब्ध असेलेल्या व्यासांच्या कथनाचा आधार घेतला आहे. महाभारतासारखा प्रसिद्ध आणि प्रभावी इतिहास नीट समजण्यासाठी तो वास्तविक रुपात जाणून घेणे महत्त्वाचं आहे. अगदी वेळ न दडवता, हे पुस्तक हातात घ्या आणि भारताच्या या महाकाव्याबद्दल फारशी ज्ञात नसलेली तथ्ये आणि सत्ये जाणून घ्या.